Cadwch yn Gynnes

Gwybodaeth ddefnyddiol am gadw'n gynnes yn ystod misoedd y gaeaf

Mae cadw’n gynnes yn hanfodol bwysig i iechyd da. Mae ein cyrff yn gweithio’n galetach yn ystod tywydd oerach, sy’n golygu ein bod yn fwy agored i heintiau a salwch. Mae pawb yn fwy tebygol o gael annwyd neu’r ffliw yn y gaeaf, ond mae’r tywydd oer yn gallu arwain at rai problemau iechyd mwy difrifol fel trawiad ar y galon, strôc a niwmonia. Mae pobl hyn yn wynebu perygl penodol gan na allwn reoli tymheredd ein cyrff cystal, ac rydym yn llai sensitif i’r tywydd oer.    Peidiwch â throi’r gwres canolog i lawr er mwyn arbed arian ar eich biliau tanwydd; gweler ein hawgrymiadau canlynol ar gyfer gwresogi’ch cartref yn effeithiol.

Cyngor ar wresogi’ch cartref yn effeithiol ac arbed ynni Wrth i gostau ynni gyrraedd eu lefel uchaf erioed, gall mesurau syml i ddefnyddio ynni’n fwy effeithlon yn y cartref gael effaith sylweddol ar eich biliau ynni. Drwy ddewis y tymheredd cywir ar gyfer eich system wresogi (rhwng 18ºC a 21ºC, neu 64ºF a 70ºF), gallwch gadw’ch cartref yn gynnes a chael biliau llai. Gweler y cyngor canlynol ar wresogi’ch cartref yn effeithiol.   Cynllun tlodi tanwydd Llywodraeth Cymru yw Nyth.  Mae’n anelu at leihau nifer y cartrefi sydd mewn tlodi tanwydd a gwneud cartrefi Cymru’n gynhesach a defnyddio tanwydd yn fwy effeithiol.  Mae Nyth yn cynnig cyngor diduedd ac am ddim ar arbed ynni, rheoli arian, hawlio budd-daliadau ac a ydych yn gymwys i gael gwelliannau i’ch cartref am ddim o dan y cynllun.  Ewch i Nyth (www.nestwales.org.uk/cym/) Os ydych yn poeni am gostau cynhesu eich cartref, gallwch ffonio 0800 512 012 yn rhad ac am ddim o linell dir neu 0300 456 2655 o ffôn symudol.  Ewch i Nyth Ceisiwch arbed ynni os yn bosibl: er enghraifft, trwy ddiffodd teclynnau yn lle eu cadw yn y modd segur, cyfnewid bylbiau cyffredin am fylbiau sy’n defnyddio ynni’n effeithlon ac yn defnyddio un rhan o bump o’r trydan, a dim ond berwi cymaint o ddwr ag sydd ei angen yn y tegell. I gael cyngor di-dâl, annibynnol a lleol ar ynni, ffoniwch yr Ymddiriedolaeth Arbed Ynni ar 0800 512 012 neu ewch i Ymddiriedolaeth Arbed Ynni.   A ydych yn ei chael hi’n anodd talu’ch bil trydan neu nwy? Cysylltwch â’ch cyflenwr ynni cyn gynted ag y bo modd. Bydd Llinell Gymorth Cartrefi Cynnes hefyd yn rhoi cyngor i chi ar dariffau llai neu ‘gymdeithasol’ sy’n cynnig prisiau mwy fforddiadwy i gwsmeriaid ar gyfer nwy a thrydan. Ffoniwch 0800 33 66 99 neu ewch i wefan Llinell Gymorth Cartrefi Cynnes.   Taliad Tanwydd Gaeaf.  Os ydych wedi cyrraedd yr oedran cymhwyso ac yn byw yn arferol ym Mhrydain neu Ogledd Iwerddon ar unrhyw ddiwrnod yn ystod wythnos 20-26 Medi 2010, gallwch dderbyn Taliad Tanwydd Gaeaf i’ch helpu i dalu am gadw’n gynnes yn y gaeaf. Gallwch dderbyn rhwng £125 a £400 yn dibynnu ar eich sefyllfa. I gael gwybod os ydych yn gymwys i dderbyn y taliad hwn ac i gael gwybodaeth am sut i gyflwyno cais, ffoniwch Linell Gymorth Taliadau Tanwydd Gaeaf ar 0845 9 15 15 15 neu ewch i Direct Gov.   Taliad Tywydd Oer.  Mae’r rhain yn cael eu gwneud yn ystod cyfnodau o dywydd oer iawn er mwyn helpu pobl i dalu am gostau gwresogi ychwanegol. Er mwyn derbyn Taliad Tywydd Oer, mae’n rhaid i’r tymheredd cyfartalog, neu’r tymheredd cyfartalog disgwyliedig, lle rydych chi’n byw gael ei gofnodi fel 0ºC am saith diwrnod yn olynol. Mae’n bosibl y byddwch yn gallu derbyn Taliadau Tywydd Oer os ydych chi’n derbyn Credyd Pensiwn. Nid oes angen cyflwyno cais; byddwch yn derbyn Taliad Tywydd Oer yn awtomatig os ydych yn gymwys. Os ydych yn credu y dylech fod wedi derbyn Taliad Tywydd Oer ond heb dderbyn taliad cysylltwch â’ch canolfan pensiynwyr neu ffoniwch y Gwasanaeth Pensiwn ar 0800 99 1234.   Gwybod sut i reoli’ch system wresogi. Gofynnwch i’ch teulu neu’ch ffrindiau am gymorth, neu cysylltwch â’ch Asiantaeth Gofal a Thrwsio leol am gyngor di-dâl. Ffoniwch 029 2057 6286 i gael gwybod sut i ddod o hyd i’ch asiantaeth leol. Os na allwch wresogi pob un o’r ystafelloedd a ddefnyddiwch, dylech wresogi’r lolfa gydol y dydd a’ch ystafell wely ychydig cyn mynd i’r gwely. Os ydych yn dibynnu ar olew i wresogi’ch cartref, dylech ystyried ffurfio grwp prynu gyda ffrindiau a chymdogion lleol i gael disgownt drwy swmpbrynu.    Ffynonellau eraill o wybodaeth a chefnogaeth ariannol